Freehold還是Leasehold - 買之前，先了解你真正買的是什麼! | MiExpert | All-in-o
(Written by Joshua Yam - Partner at Spencer West LLP)
英格蘭、威爾士嘅土地業權制度係個複雜議題，入面牽涉好多法律細節，當中最常見嘅兩種業權類型：「Freehold（永久業權）」及「Leasehold（租賃業權）」。
兩者有好大分別，Freehold 代表你「真正擁有」土地及物業；Leasehold 僅限擁有「使用權」，喺指定年期內使用該物業（通常係 125 年或者 999 年），同時需要遵守條款，例如每年支付 Ground Rent（地租）或者 Service Charge（管理費）。所有 Leasehold 都係由 Freehold 延伸出嚟，不過實際情況可以有好多唔同變化，有時仲會牽涉法律結構。
簡單總結，如果買 Leasehold 物業，你只係擁有使用該物業同土地嘅權利，並非真正擁有土地，土地仍然屬於 Freeholder 永久業權持有人。至於業主需要承擔嘅責任、權利範圍等，通常會寫喺正式法律文件。Freehold 物業一般會用「Transfer Deed（轉讓契）」；Leasehold 則會有一份「Lease（租契）」去列明相關條款。
好多客人以為 Freehold 一定比 Leasehold 簡單，事實上未必，要視乎物業性質同土地情況，有啲 Freehold 物業可能帶有類似 Leasehold 嘅限制同責任。例如，如果你買一個大型屋苑嘅新樓 Freehold House，通常會有業權附帶一啲限制條款，同 Leasehold 物業好相似。另外，如果屋苑有由管理公司負責管理嘅公共空間，業主亦有機會需要每年支付管理費用，性質上同 Leasehold 嘅 Service Charge 類似。
Freehold、Leasehold交易文件8大留意事項
當律師代表買家處理物業交易時，通常會重點檢查以下事項：
- 物業嘅法律文件，有冇清楚列明你真正擁有嘅土地範圍？
- 法律文件有冇提供足夠權利，令你可以正常使用及享受物業？呢啲權利包括地面範圍、地下設施如排水渠、污水渠接駁權等。
- 業權有冇限制你點樣使用物業？例如可否喺屋企經營生意？
- 有冇任何需要每年支付嘅費用？如果有，要交俾邊個？
- 如果需要支付年度費用，法律文件有冇清楚列明相關服務內容？收費條款又係咪合理及合法？
- 法律文件入面嘅條款，銀行或者按揭機構會唔會接受？如果唔接受，又應該點樣修正或者處理？
- Land Registry（土地註冊處）有冇附加任何 Restriction（限制）？如果有，我哋需唔需要額外程序處理，又會涉及咩費用？
- 業權紀錄入面，有冇早於現時物業興建前已存在嘅歷史條目？如果有，相關內容係咩？會唔會存在法律風險或者有需要特別留意嘅地方？
當然，每塊土地、每個物業情況唔一樣，以上只係部分例子，並唔代表全部。
經驗豐富英國物業律師 幫你有效跟進
無論你準備喺英格蘭、威爾士買樓，或已經持有物業，都一定要清楚了解自己嘅權利、責任，以及可能涉及嘅法律風險。一位有經驗嘅律師，唔單止可以幫你發現潛在法律問題，更重要係能夠用簡單清晰嘅方式，解釋複雜法律概念，避免將來出現不必要嘅糾紛、麻煩，甚至財務損失。
Spencer West 律師事務所合夥人 Joshua Yam 擁有超過 13 年住宅物業經驗，專門協助亞洲客戶（尤其香港客戶）處理英格蘭及威爾士住宅物業相關事務。如果你需要協助處理英國住宅物業交易，包括買樓、賣樓、轉名（Transfer of Equity）或物業再按揭（Refinance）等，歡迎聯絡我哋預約免費諮詢及報價。
WhatsApp: +44 7468 531352
Email: [email protected]